अबदेखि राजश्व तिरेको २४ घण्टाभित्र गाडी चालक अनुमतिपत्र दिइनेछ : सञ्चारमन्त्री तिमिल्सिना

वैशाख ४, २०८३ शुक्रबार १०:२३:२१ | रासस

काठमाण्डौ - सञ्चार तथा सूचना प्रविधिमन्त्री डा. विक्रम तिमिल्सिनाले आजदेखि सेवा ग्राहीले ट्रायल पास गरेपछि राजश्व तिरेको २४ घण्टाभित्र गाडी चालक अनुमतिपत्र पाउने बताउनु भएको छ ।

काभ्रेको पनौती नगरपालिका–५ मा रहेको सुरक्षण मुद्रण केन्द्रको अवलोकन गर्दै मन्त्री तिमिल्सिनाले यसबारे जानकारी दिनुभयो । उहाँले गाडी चालक अनुमतिपत्र छपाइको अवस्थाबारे पनि जानकारी लिनुभएको छ । निरीक्षणका क्रममा मन्त्री तिमिल्सिनाले सार्वजनिक सेवा प्रवाहलाई छिटो, प्रभावकारी र नागरिकमैत्री बनाउने सरकारको प्राथमिकता रहेको उल्लेख गर्नुभयो ।

उहाँले लामो समयसम्म गाडी चालक अनुमतिपत्र नपाउने समस्याको अन्त्य गर्दै सेवाग्राहीलाई सहज सेवा उपलब्ध गराउने लक्ष्य सरकारको रहेको बताउनुभयो । साथै, बाँकी रहेका सबै गाडी चालक अनुमतिपत्र आउँदो असार मसान्तभित्र छापिसक्ने योजना रहेको पनि उहाँले जानकारी दिनुभयो ।

निरीक्षणका क्रममा उहाँले सुरक्षण मुद्रण केन्द्रलाई राज्यको महत्त्वपूर्ण र सम्भावनायुक्त संस्थाका रूपमा विकास गर्नुपर्नेमा जोड दिनुभयो । ठूलो लगानीमा खरिद गरिएका झण्डै एक अर्ब रुपैयाँ बराबरका उपकरण वर्षौंदेखि प्रयोगविहीन रहेकोप्रति असन्तुष्टि जनाउँदै ती उपकरणलाई पूर्ण रूपमा सञ्चालनमा ल्याउन निर्देशन दिनुभयो ।

उहाँले नागरिकको डाटा सुरक्षा सरकारको उच्च प्राथमिकता रहेको उल्लेख गर्दै सेवा प्रवाह नागरिकको हितमा केन्द्रित हुनुपर्नेमा जोड दिनुभयो । त्यसैगरी, देशभर मोबाइल नेटवर्क र इन्टरनेट सेवाको गुणस्तर सुधार गर्ने विषय मन्त्रालयको प्राथमिकतामा रहेको बताउँदै नेपाल टेलिकमको सेवा सुधारमार्फत आगामी एक वर्षभित्र सबै नागरिकलाई प्रविधिको पहुँचमा ल्याउने लक्ष्य रहेको जानकारी दिनुभयो ।

सुरक्षण मुद्रण केन्द्रका कार्यकारी निर्देशक देवराज ढुङ्गानाले संस्थालाई दीर्घकालीन रूपमा सुदृढ बनाउने उद्देश्यले व्यावसायिक योजना तयार भइरहेको बताउनुभयो । उहाँका अनुसार भविष्यमा यही केन्द्रबाट राहदानी, चेकबुक, स्मार्टकार्ड, हुलाक टिकट तथा अन्तःशुल्क स्टिकरजस्ता महत्त्वपूर्ण सामग्री छाप्ने योजना छ ।

हाल केन्द्रमा दैनिक करिब ४० हजार गाडी चालक अनुमतिपत्र छपाइ भइरहेको र विदेश जाने नागरिकका लागि गाडी चालक अनुमतिपत्रलाई प्राथमिकतामा राखिएको उहाँले जानकारी दिनुभयो ।

यातायात व्यवस्था विभागबाट दैनिक झण्डै एक हजार आवेदन प्राप्त हुने र वैशाख १२ गतेभित्र १२ लाख तथा बाँकी १७ लाख गाडी चालक अनुमतिपत्र असार मसान्तभित्र छापिसक्ने लक्ष्य रहेको पनि उहाँले बताउनुभयो ।

अन्तिम अपडेट: बैशाख २८, २०८३

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्