धेरै रकम तर कम सर्त राखेर सहयोग गर्न दातृ निकायलाई अर्थमन्त्रीको अनुरोध

 चैत २८, २०७६ शुक्रबार १९:५६:४० | उज्यालो सहकर्मी
unn.prixa.net

काठमाण्डौ - अर्थ एव‌ सञ्चार तथा सूचना प्रविधि मन्त्री डा युवराज खतिवडाले कोरोना भाइरसपछिको नेपालको अवस्थाबारे विभिन्न दातृ निकाय र अन्तर्राट्रिय बहुपक्षीविकास संस्थासँग भिडियो छलफल गर्नुभएको छ ।

मन्त्री खतिवडाले विश्व बैक, अन्तर्राष्ट्रिय मुद्रा कोष,  अन्तर्राष्ट्रिय  वित्त निगम, एशियाली विकास बैक, एशियाली पूर्वाधार विकास बैक जस्ता बहुपक्षीय विकास संस्था लगायत संयुक्त राष्ट्र संघका उच्च पदस्थ पदाधिकारी बीच हालै विश्वभर फैलिएको कोरोना भाईरसले नेपालको अर्थतन्त्र, स्वास्थ्य क्षेत्र र जनजीवनमा पारेको एवं पार्न सक्ने प्रभाव, यसको  नियन्त्रणमा नेपाल सरकारले हालसम्म चालेका संस्थागत र कार्यक्रमिक कदमहरु तथा नेपालले आगामी दिनमा चाल्नुपर्ने रणनीतिक कदमहरु बारे आज भिडियो कन्फरेन्स मार्फत छलफल भएको हो । 

अर्थमन्त्रीले आफ्नो भनाइ राख्ने क्रममा अहिलेको संकट एक्काइसौं शताब्दीको सबैभन्दा ठूलो मानवीय र आर्थिक संकट रहेको बताउनु भयो । उहाँले विगतका संकट या त मानवीय थिए या आर्थिक थिए र ती अघि पछि भएर आएका थिए भन्ने उल्लेख गर्दै अहिले मानवीय र आर्थिक संकट सँगसँगै आएको बताउनु भयो ।

उहाँले पहिलेको कुनै पनि संकट भन्दा अहिलेको संकटको दायरा फराकिलो  र असर पनि सर्वथा उच्च रहेकोले यसबाट उम्कन र विकासको पुनर्उत्थान गर्न पनि अभूतपूर्व सामाजिक र आर्थिक उपायहरु अपनाउनुपर्ने बताउनु भयो।

अर्थमन्त्री खतिवडाले  कोरोना संक्रमण रोकथाम र नियन्त्रण तथा यस क्रममा अर्थतन्त्रमा देखा परेका चुनौती समाधान गर्न नेपालले कुनै कसर बाँकी नराख्ने विश्वास दिलाउँदै यसमा अन्तर्राष्ट्रिय, क्षेत्रीय तथा द्विदेशीय सहयोगको पनि उत्तिकै आवश्यकता रहेको बताउनु भयो ।

यस्तै अर्थमन्त्रीले विकास साझेदारहरुसँग परम्परागत सहायता नीति, कार्यक्रम तथा सहायताका उपकरणबाट मात्र अहिलेको संकटको समाधान नहुने भएकोले नवीन सहायता, नीति, कार्यक्रम र सहायता उपकरणबाट मात्र नेपालको संकटको समाधान हुने बताउनुभयो ।

विकास सहायताको प्रकार, विधि, शर्त तथा ऋणको लागत एवं प्रक्रियालाई परिमार्जन र सरलीकृत गर्नुपर्ने र  वैदेशिक ऋणको सावाँ व्याज भुक्तानीको समय केही वर्ष पर सार्नुपर्ने आग्रह पनि गर्नुभयो ।

भिडियो कन्फरेन्समा विश्व बैंकका उपाध्यक्ष हार्टविग सेफर,अन्तर्राष्ट्रिय  मुद्रा कोषका डाईरेक्टर च्याञ्योङ्ग रि, अन्तर्राष्ट्रिय  वित्त निगमका भाईस प्रेसिडेन्ट नेना स्टोजोभिक, एशियाली विकास बैकका भाईस प्रेसिडेन्ट सिजिन चेन, एशियाली पूर्वाधार विकास बैकका भाईस प्रेसिडेन्ट तथा चिफ अपरेटिङ्ग अफिसर डि जे पान्डिन, नेपालका लागि संयुक्त राष्ट्र संघीय आवासीय प्रतिनिधि भेलीरी जुलिएन्ड,  नेपालस्थित विश्व बैकका कन्ट्री  म्यानेजर, नेपाल स्थित एशियाली विकास बैंकका कन्ट्री डाइरेक्टरसँग प्रत्यक्ष छलफल भएको थियो ।

अन्तिम अपडेट: कात्तिक १८, २०७७

तपाईको प्रतिक्रिया