रसुवागढी जलविद्युत् आयोजनाको उपकरण जडान र प्रसारण लाइन निर्माणको काम ठप्प

 भदौ ३१, २०७७ बुधबार ११:५:५४ | उज्यालो सहकर्मी
unn.prixa.net

रसुवा – रसुवामा निर्माणाधीन रसुवागढी जलविद्युत् आयोजनाको उपकरण जडान र प्रसारण लाइन निर्माणको काम ठप्प भएको छ ।

उपकरण जोड्ने र प्रसारण लाइन निर्माण गर्ने कामदार नहुँदा गएको चैत ८ गतेदेखि निर्माण कार्य ठप्प भएको हो । भारतीय कामदार फर्कन नपाउँदा समस्या भएको आयोजनाले जनाएको छ । आयोजनाका अनुसार इलेक्ट्रोमेकानिकलको जिम्मा पाएको भोइठ हाइड्रोले गएको चैत ८ गतेदेखि नै काम गरेको छैन ।

नेपालमा भन्दा पहिला भारतमा लकडाउन भएको र नेपालमा पनि हुने भएपछि भारतीय टोली चैत ८ गते नै आफ्नो देश फर्किएको थियो । अहिले भोइठ हाइड्रोले ३२ जना भारतीय र ३८ जना नेपाली कामदारको सूची आयोजनालाई बुझाएको छ । आयोजनाले गएको साउन अन्तिममा भारतीय चार जनाको सूची उर्जा मन्त्रालयमा पठाएको भएपनि त्यो अझै स्वीकृत भएको छैन ।

उपकरण तथा निर्माणको सामग्री भने आइसकेको छ । अहिले २२ जना चिनियाँ कामदार र आयोजनाको इलेक्ट्रोमेकानिकल तर्फको ४ जना (भारतीय) व्यवस्थापक आउन लागेको भएपनि स्वीकृत नभएका कारण समस्या आएको आयोजना प्रमुख छबि गैरेले बताउनुभयो ।

आयोजनामा अहिले सिभिलतर्फ ३ सय ७९ नेपाली र ८८ जना चिनियाँ कामदार रहेका छन् । लकडाउनको समयमा पनि आयोजनामा ७ सय नेपाली र १ सय ७६ चिनियाँ कामदार रहेका थिए । २०७० माघदेखि निर्माण भएको आयोजनाको झण्डै ७८ प्रतिशत काम सकिएको छ ।

अन्तिम अपडेट: असोज ३, २०७७

तपाईको प्रतिक्रिया