आगाे निभाउने क्रममा एक जनाकाे ज्यान गयाे

 चैत १३, २०७७ शुक्रबार १८:१०:२८ | उज्यालो सहकर्मी
unn.prixa.net

रुकुम पश्चिम – रुकुम पश्चिमको बाँफिकोट गाउँपालिका १० गारावाङमा आगो निभाउने क्रममा जलेर एक जनाकाे ज्यान गएकाे छ । जङ्गलमा लागेको आगो गाउँतिर पसेपछि आगो निभाउने क्रममा ४५ वर्षीया सर्केनि दमाईको जलेर ज्यान गएकाे हाे । आगो निभाउन खोज्दा जलेकी सर्केनीको घटनास्थलमै ज्यान गएकाे वडा सदस्य तिलक खड्काले जानकारी दिनुभयो । 

गाउँलेसँगै आगो निभाउन खटिएकी सर्केनिलाई आगोले भेटेको थियो । त्यस्तै आगलागीका कारण गगन जैसीको गोठ जलेर नष्ट भएको छ । बिहीवार वडा नम्बर १० को राजिखेत भन्ने ठाउँबाट सुरु भएको आगो आधा दर्जनभन्दा बढी जङ्गलमा फैलिएको वडा सदस्य खड्काले बताउनुभयो ।

आगो गाउँतिर फैलिएपछि स्थानीयवासी त्रसित बनेका छन् । आगो छेकेर गाउँ बचाउने प्रयासमा उनीहरू जुटेका छन् । आगो नियन्त्रणमा आउन सकेको छैन । सुविखाली सामुदायिक वन, चमेरेपातल सामुदायिक वन, चक्कुलाउने कबुलियति वन, तेस्रापाखा सामुदायिक वन, देउरालीचुरा राष्ट्रिय वन र वयाल्ने राष्ट्रिय वनमा आगो लागिरहेको छ ।  

अन्तिम अपडेट: चैत ३०, २०७७

तपाईको प्रतिक्रिया