गण्डकी र लुम्बिनीमा वर्षा : दिउँसोपछि देशभरको मौसम बदली हुने

 असार १०, २०७८ बिहिबार ९:१७:२ | उज्यालो सहकर्मी
unn.prixa.net

काठमाण्डाै – अहिले गण्डकी र लुम्बिनीका केही ठाउँमा पानी परिरहेको छ । गण्डकी र लुम्बिनी प्रदेशका केही ठाउँ तथा वाग्मती र कर्णालीका थोरै ठाउँमा पानी परिरहेको जल तथा मौसम पूर्वानुमान महाशाखाले जनाएको छ । गण्डकी र लुम्बिनीमा गएरातिदेखि नै लगातार पानी परेको हो ।

यस्तै अहिले काठमाण्डाै उपत्यकाका केही ठाउँमा घाम लागेकाे छ । आज दिउँसोपख देशभरको मौसम बदली हुने पूर्वानुमान रहेको महाशाखाका मौसमविद् बरुण पौडेलले बताउनुभयो । मौसम बदलीपछि प्रदेश एक, वाग्मती, गण्डकी र लुम्बिनीका धेरै ठाउँमा पानी पर्ने महाशाखाको अनुमान छ । एक दुई ठाउँमा मेघगर्जन र चट्टयाङसहित ठूलो पानी पर्ने भएकाले सर्तकता अपनाउन महाशाखाका मौसमविद् पौडेलले आग्रह गर्नुभएको छ ।

उहाँका अनुसार प्रदेश दुई, कर्णाली र सुदूरपश्चिमका थोरै ठाउँमा हल्कादेखि मध्यम वर्षाको सम्भावना रहेको छ । आज राति पनि वाग्मती, गण्डकी र लुम्बिनीका एक/दुई ठाउँमा मेघगर्जन र चट्टयाङसहित ठूलो पानी पर्ने सम्भावना छ ।

अन्तिम अपडेट: असार १५, २०७८

तपाईको प्रतिक्रिया